Саяқ кентінде күрделі жөндеуден кейін дәрігерлік амбулатория ашылды. Ауыл тұрғындары ашылу салтанатында медициналық көмек көрсету үшін қажетті жағдайлармен толық жабдықталған әдемі, жылы ғимаратпен танысты.
Амбулаторияда сол күні баланы дамыту кабинеті ашылды, алдағы уақытта онда аналар мен балалар мамандар өткізетін “денсаулық сабақтарына” қатысатын болады.
Ауыл тұрғындары мұндағы тіс дәрігері кабинетіне ерекше қуанды. Енді тіс емдеу үшін оларға қалаға барудың қажеті жоқ. Ал МӘМС шеңберінде тегін стоматологиялық қызметтерді жүкті әйелдер мен 18 жасқа дейінгі балалар ала алады.
Медициналық мекемеде 3 дәрігер және 4 орта медициналық қызметкер жұмыс істейді.
Саяқ ауылының мысалында ауылда денсаулық сақтау саласын дамытуға жіті назар аударылғанын көруге болады.
Осы жылы жазда дәрігерлік амбулаторияның зертханалық кабинетіне зертханалық зерттеулер жүргізу үшін аппараттар сатып алынды. Ғимаратқа күрделі жөндеу жүргізілді, балалар үшін баланың даму кабинеті ашылды, стоматологиялық кабинет толық жабдықталды.
Дәрігерлік амбулатория корпусының ашылуы кезінде ауыл тұрғындары әкімдік, Балқаш қаласының №1 Емхана әкімшілігі және “As-SK” ЖШС мердігер ұйымының қызметкерлеріне алғыстарын білдірді. Емхана ұжымы мен кент тұрғындары “As-SK” ЖШС директоры Кушеров Ерлан Серікұлына, құрылыс тобының жетекшісі Байбурин Берік Қожнабайұлына ғимаратты қалпына келтіру бойынша жүргізілген сапалы және жедел жұмысы үшін алғыс білдіреді.
